З'явіліся спадарожнікавыя здымкі з месца ўдару ГУВ па хуткасным катары РФ у Крыме
- 7.05.2024, 9:02
- 3,408
Устаноўлена дакладная лакацыя знішчэння «Мангуста».
У бухце Вузкая недалёка ад пасёлка Чарнаморскае ў часова акупаваным Крыме ўночы 6 траўня надводны робат Галоўнай управы выведкі Мінабароны Украіны ўдарыў па расейскім хуткасным катары. Са спадарожніка бачна пашкоджанне пірса, да якога быў прышвартаваны катар РФ.
Здымак апублікаваў праект «Схемы».
6 траўня ГУВ МА заявіла аб паспяховай аперацыі падраздзялення Group 13 у водах паблізу Крыма. Марскі беспілотнік «Магура V5» знішчыў хуткасны катар расейскіх захопнікаў.
Журналісты дзякуючы відэа, якое апублікавала прэс-служба ГУВ, устанавілі дакладную лакацыю. На кадрах, зробленых спадарожнікам Planet Labs, бачна месца трапляння і пашкоджаны пірс, да якога быў прышвартаваны варожы катар.
У эфіры тэлемарафону прадстаўнік ГУВ Андрэй Юсаў паведаміў, што гэта судна з серыі «Мангуст», кошт якога ацэньваецца больш чым на 125 млн рублёў (1,3 млн даляраў).