Мінулай ноччу ў Беларусі быў пабіты тэмпературны рэкорд 1912 года
3- 9.05.2024, 18:47
- 9,376
Тэмпература апусцілася да 6 градусаў марозу.
Другую ноч запар на беларускіх метэастанцыях абнаўляюцца тэмпературныя антырэкорды. У Расонах на поўначы Віцебскай вобласці пахаладала да 5,8 градуса марозу - гэта новы абсалютны мінімум ночы на 9 траўня, сведчыць праведзены «Позіркам» параўнальны аналіз аператыўных і архіўных звестак Белгідрамета. Ранейшы антырэкорд трымаўся з 1912 года — 3,3 градуса ніжэй за нуль у Менску.
У двух населеных пунктах абноўленыя гістарычныя мінімумы месяца. У Верхнядзвінску тэмпература апусцілася да 4,6 градуса марозу (было -4,5°С 11 траўня 2017 года), у Мсціславе - да -3,4°С (-2,6°С 8 траўня 2023 года).
Яшчэ ў двух гарадах травеньскія мінімумы паўтарыліся, адначасова перапісаныя антырэкорды ночы на 9 траўня. У Горках было 4,4 градуса марозу (столькі ж — 8 траўня 1953 года; ранейшы антырэкорд ночы — 2,6 градуса ніжэй за нуль у 1912 годзе), у Слаўгарадзе — 3,1 градуса марозу (столькі ж — 1 траўня 2017 года; ранейшы антырэкорд ночы - 0,8 градуса вышэй за нуль у 1999 годзе).
Усяго мінулай ноччу зафіксавана 19 лакальных рэкордаў холаду, у тым ліку ў двух абласных цэнтрах - Віцебску (-4,1°С супраць -3,1°С у 1999 годзе) і Магілёве (-1,3°С супраць -0,9°С таксама ў 1999 годзе). У Менску пахаладала да -2,3°С, аднак антырэкорд выстаяў (паказчык згаданы вышэй).
Уначы 10 і 11 траўня тэмпература чакаецца станоўчай, 12 траўня Белгідрамет прагназуе замаразкі да -3°С.