Расейскі шоўмэн Светлакоў распавёў, як яму ўдалося выбрацца з «Крокуса»

Комік знаходзіўся ў канцэртнай зале падчас атакі тэрарыстаў.

Расейскі шоўмэн Сяргей Светлакоў знаходзіўся ў падмаскоўнай канцэртнай зале «Крокус Сіці Хол» падчас нападу тэрарыстаў 22 сакавіка. Разам з іншымі наведвальнікамі ён забарыкадаваўся ў калідоры, стральба была за некалькі метраў, расказаў актор Ксеніі Сабчак.

- Тэрарысты ўвайшлі ў залу з боку амфітэатра (акурат над ім размяшчаюцца ложы, дзе мы і знаходзіліся, потым некалькі чалавек паспелі залезці туды). Стральба была без перапынку направа і налева. Многія, пачуўшы стрэлы, пабеглі да сцэны. Мы павыскоквалі ў вузкі калідор. Там утварылася група з 20-30 людзей. Дзяўчына-мэнэджарка, якая была на паверсе, знайшла ключы і закрыла выхады з усіх ложаў (бо ўсе, хто там быў, ужо выбеглі, і мы баяліся, што адтуль залезуць тэрарысты, стральба была даслоўна за некалькі метраў).

Далей з некалькімі хлопцамі мы наважыліся забарыкадаваць уваходы ў наш калідор: крэслы, канапы… Тут быў, мусіць, самы страшны момант - гукі стральбы заціхлі і праз паўзу дзверы ў калідор, насупраць якіх былі мы з сябрам і маёй пляменніцай Машай, пачалі ўзломваць. Мусіць, усе ў калідоры развіталіся з жыццём, бо мы не ведалі, колькі тэрарыстаў і які ў іх план. Дзверы знеслі хутка - гэта былі гледачы, людзі шукалі выхад.

Паваліў моцны смярдзючы дым і трэба было думаць, што рабіць далей, прайшло да гэтага часу 15-20 хвілін прыкладна...І зноў жа мэнэджарка прапанавала адчыніць некалькі дзвярэй і па лесвіцы выбегчы групай праз фае. Усе пагадзіліся і ў цішыні пачалі рухацца, жанчыны знялі абцасы, панікі моцнай не было... Калі мы выйшлі з гэтага калідора, патрапілі ва ўжо задымленае фае. Узбоч стаяў іншы працаўнік «Крокуса» і махаў нам, каб мы беглі не праз цэнтр.

Пасля мы апынуліся на вуліцы. Так, без адзення, мы беглі яшчэ некалькі кіламетраў, туды, дзе чакала мяне жонка на аўтамабілі, якая спазнілася, на шчасце.

Я сёння знайшоў імя той дзяўчыны, якая не разгубілася і рэальна ўсім дапамагла - Сафія Мэер. Дзякуй ёй! Яна гераіня.

Спачуванне ўсім пацярпелым. Гэта было пекла.

Нагадаем, увечары 22 сакавіка невядомыя мужчыны, узброеныя аўтаматамі, уварваліся ў будынак Crocus City Hall у падмаскоўным Краснагорску і адкрылі агонь. Паводле інфармацыі СК Расеі, у выніку нападзення загінулі 133 чалавекі.